[el mostafa]

مصطلحات أخرى للرياس الاعزاء...
البحر مكرط........يعني هربان مزيان..خاوي بزاف ملي تكون المرية اكبيرة.
المرية كبيرة........لما يهرب البحر بزاف
كاين الحصران.....يعني المرية صغيرة البحر ماكايطلعش بزاف او ما كايهربش بزاف.
الدوران...........لما يبدأ البحر في التحرك باش يرجع الى كان عامر أو ملي يبغي يطلع ملي يكون هربان
(اثناء الدوران كايكون الحوت موجود او باغي ياكل))
الماء مستور.......ماصافيش بزاف أوما مخلوضش بزاف (مزيان للشرغو)
كاين الصفو........ هي الماء صافي
الماء ضاوي........هي صافي بزاف جاجة
كاين الشعل.........لما يكون الماء ضاوي أو فيه بزاف ديال ((الفوسفور)) بحيث تظهر ليك الموجة بالليل شاعلة بحال
العافية أو الضوء...يعني بلا ما تمشي تصيد الحوت كايهربو الشعل..
البحر مبورش أو البحر منفوخ.....يعني لما تكون الرياح كثيرة ونافخة البحر ولها تأثير على الامواج بحيث يظهر
لك البحر كله امواج صغيرة وكثيرة جدا ومتفرقة...في هده الحالة انا بعدا ما كانصيدش
الحوت مضروص......الحوت ماكايكلش حيث الماء بارد بزاف (مكلاصي) عندما تلاحظ بان الحوت ما كايقيسش الطعم
لما تجبد الخيط ديالك اول حاجة تدير هي لمس اللدونة راك تلقاها مكلاصية...

والى فرصة أخرى...خليو ليا الوقت انقلب في المزيويدة الى باقي شي حاجة...

[sargus]

السلام عليكم و رحمة الله تعالى و بركاته

.
أخي الفاضل الرايس el mostafa لا أخفي عليك مدى سروري و إعجابي
بمداخلتك الرائعة ، الغنية و المتميزة هته التي أستفدت منها كثيرا و الله !!!
و مشكووووور على سعيك الصادق و العفوي لإغناء المواضيع لتعم بذلك
الفائدة للجميع و هذا إن شاء الله ما نصبو إليه جميعا وهو
خدمة هوايتنا الرائعة لضمان تقدمها ، ا زدهارها و انتشارها .
تقبل مني كل معاني الأخوة و التقدير كما ننتظر جديدك
دمتم جميعا بودّ .
و السلام

[vivmoroco]

بسم الله الرحمن الرحيم

الله إبارك فيك ايها الأخ الجليل لقد غصت في اعماق المصطلحات العتيقة وابليت بلاأٌ حسنآ وفقك الله.
كاين الشعل = يقال لها بالأمازغية (أزورف)
البحر مبورش= يقال لها في الجنوب (لبحر فيه الطُورما)
لبحر فيه الخرفان=تقال عندما يكون تحت تأثير الرياح الشمالية ويكون ملئ بتقطعات من المويجات البيضاء بداخله
الرشما= تقال كذلك عند بداية المد كما في بداية الجزر (الحوت كياكل غير فالرشما)
أمتٌان=تقال عندما يكون ماء البحر له لون مثل لون القهوة ويرمي بالأسماك ميتة للخارج (لبحر فيه أمتٌان كايلوح الحوت ميت) وهذه الكلمة بالأمازغية
لبحر منكب=تقال عندما يكون شريط من ماء البحر غير صافي و ورائه المتبقي من ماء كالزجاج من كثرة صفائه
و الى فرصة أخرى ان شآء الله..

[sargus]

السلام عليكم و رحمة الله تعالى و بركاته
وتحية خالصة لكل أعضاء و مشرفي هذا المنتدى الطيب.

بعض المصطلحات الأخرى التي يستعملها الريّاس :

التشياع : تشيّع على السبيب بمعني تحاول رأية الخيط بالليل عندما يتعذر ذلك لشدة الظلمة .
و ذلك بتوجيهه نحو مصدر ضوئي قريب .

الحليب : ْتْحْلَب السبيب : يستعمل هذا المصطلح أكثرية من طرف الصياد بلاتوش و هو رهين باستعمال '' الجرّارة '' . و يعني جمع الخيط ملي كتشد الحوت بالاستعانة بكلتا اليدين بالتناوب، و هي عملية دقيقة جدا تتطلب جهد و مهارة الصياد .

العلامة أو العلاّم : يشبه فرشية صغيرة و دوره فقط ضبط عمق الصيد يستعمل في الصيد بالتوقيفة .

التقنطير :تقنطر الحوت بمعنى كتجيبو لعندك ملي كتشدو .

الفلوس écaille : حراشف السمك .

الربيعة أو الخز algue : تعني الطحالب البحرية .

الحجَر rocher : بمعنى الصخورو هو ضد لكلمة '' الكوشطة ''.

البيكي pique ou piquet : اداة لتثبيث الصنارة و هو نوعان ، قصير يستعمل للتثبيت في الصخور،و طويل للتثبيث في الرمل .

أرجو من كل من كانت لديه إضافات جديدة أخرى ، ملاحضات ، أو تصحيحات لمصطلحات قد وردت ألا يبخل علينا بها. تقبلوا مني جميعا كل الود و التقدير .


.

[el mostafa]

السلام عليكم يارياس....مصطلحات جاري بها العمل حسب المنطقة.....
فنش............غرق
نشط............رد في الحوتة ferrer
الصياد كايتريس....لما كايكون شاد واحد الحوتة مزيانة أو كايتعامل معاها..يجيبها الى عطات الراس...ويطلق ليها لما تجر
الحوتة كاتدمك......لما كاتكون جايب الحوتة.. وفي لحظة كاتجرليك الخيط بقوة
عطيها الخيط...هي اطلق ليها...سرح ليها..اتسايس معاها...وبعبارة اصح"اتريس معاها"
صفح الحوتة....يغني في الشاطئ لما كاتريس مع الحوتة وتقرب لحداك كاتبقا كاتعوم وتهرب ليك لليمن مرة وللشمال مرة أخرى هاديك الساعة خاصك تفحها يعني تطيحها على جنبها باش تشل الحركة ديالها وتغلب عليها.
كايتسنط للخيط.....لما يكون الصياد قابط الخيط بالسبابة وكايتسنط للخيط باش يرد فش حوتة مضخمة وهده هي طريقة صيد القرب...الكوربينا حيث الضرب ديالها بحتا شي حوت صغير بزاف ..اوكاتغفلك (( الى نعستي))
الدكة........هي لما كاتدق السردين باش تصاوب واحد الكورة ديال الرش لكوربينا..
راشمة الزريقة.....لما كاتوصل المصيد اوكاتسول واش كاين شي رشيم يقولو ليك راشمة يعني احد الصيادين صيدشي زريقة
زعيطيطة......هي زريقة صغيرة نصف كيلو
الدرعي كايفنير....هي الدرعي لما يكون تابع البوري أو تايتهز قدامك فوق الماء
الصياد مشا يضرب على الطعم....يعني مشا يقلب على الدودة ويحفر عليها
كاين الرشم ديال بوخو....لما كتكون اتقلب على بوخو أو تلقى الرشم ديالو مصور في الحجرة اللي قلبتي
كاين الرشم اديال الدودة الحمرة.....لما كاتكون تقلب على الدودة ويبان ليك واحد الفسخ ديالها خلاتو فوق الرملة
واش مشى معاكم المنزلة.....-(( هده من باب النكنة فقط)))= وهي كايكون واحد الاخ لما كا يرافقكم للصيادة معمركم تجيبو شي حاجة...فالاخوة الصيادة كايسميوه المنزلة من اجل الضحك...فتصوروا كون مشاو وحدهم أو ما صيدو والو غادي يرجعو ساكتين طايرليهم..ولكن مللي معاهم السيد (( المنزلة)) فانهم يقلبوها تقشاب وضحك حتس يوصلو.......والسلام عليكم
]

[vivmoroco]

بسم الله الرحمن الرحيم

الله إيحفظك رديتينا لواحد ازمان نسيناه غير سير فهاديك اطريق راها سالكا ؤ ما غادي تلقا غير الخير أ الرايس el mostafa .
الدرعي كايفنير =عندنا كانقولو . الدرعي مريٌش
الكركان = هي نوع من الطعم الإصطناعي من الخشب وهو قديم جدآ عليه صاوبو الربالا
مقوس = الصياد ملي كايشد شي حوتا كبيرا القصب ديالو كاتدير بحال شي قوس ديال انبل للي كانو كيحاربو بيه فالقديم
الغمزا = la touche ملي كيكون صبعك على الخيط كاتحس بلغمزا ديال الحوتا الى قاست عليك

و الى لقاء آخر ان شآء الله.

[el mostafa]

تحية طيبة للرايس vivmorocco وجميع الرياس اصدقاء هدا المنتدى النشط....
الدرعي مريش.......عندنا بالجديدىة هو اكثير فوق الماء وغير تاينزل الطعم أو هاهو معاه

الرايس مقوس......عندنا في الجديدة نقول الرايس مشانق

واحنا دابا ولينا خاصنا غير معامن نتشانقو..... الحوت ..ماشي بنادم..
كاتشحط........كاتلانصي

القوس وقف........يعني لما كاتشحط في الشاطئ وتغرس البيكي كاتخلي القوس مقوس شوية بفعل (البلومبة) وهي اللدونة أو الثقيل......فلما يوقف القوس ..كلشي الصيادة الموجودين يصيحون راه القوس وقف .. علامة غلى ان هناك سمكة حيث انها لما كاتشد فيها اسنارة ادا توجهت لداخل البحر فانها تبدأ بجر القوس...وادا توجهت نحو الشط فان الخيط كايترخى والقوس كايوقف...ففي بعض الاحيان كاتبقى تجمع الخيط وكأنه خاوي وتظن أنها طلقت السنارة..ولما كاتجمع الخيط بزاف بزاف عاد كاتحس بالحوتة حيث كاتكون كاتجري بزاف الأمام نحوك...

ايوا احنا ولينا دابا كانتريسو غير بالكتبة...غير الله يصبرنا ويصبركم.

[sargus]

السلام عليكم و رحمة الله تعالى و بركاته
تحية خالصة ليك أخي الحبيب و الغالي el mostafa.
لا أجد كلمات شكر ولا امتنان لأعبر لك عن ما بداخلي من إعجاب و تقدير .
بارك الله فيك و حفضك و وفقك و جزاك عنا كل خير لعطائك و سخائك و بياض قلبك.
و لا أخفي عليك أنني استفدت كثيرا من المصطلحات التي تتحفنا بها .
نسأل الله أن تكون مميزا دائما و أن يوفقك في كل ماتطمح إليه .
أ يوا !! عنداك الرايس el mostafa !!! راه القوس وقف !!
لكم مني جميعا كل الود و التقدير
و السلام.

[sargus]

السلام عليكم و رحمة الله تعالى و بركاته

تحية ريّاسية لكل من هو محب و غيور على هته الهواية النبيلة .

مصطلحات أخرى جديدة :

البلْية : بلغة الرايس هي هواية الصيد .

تخرّص الطعمة : تدخلها فالسنارة .

الحفرة : المصيد ديال بيلوطة. كاينين شي حفاري مزيانين جيهْتْ كذا و كذا .

كيدير البحر ؟.. سؤال عادة ما نسمعه من الرياس للسؤال عن حالة البحر .

يشَد الما : يعمر البحر .

الڭوانو : زيت السردين او كبايلا و المستعمل في العجينة ديال بيلوطة .

تقلّب الڭصبة : تجمع الخيط باش تشوف واش الطعمة ''طارت '' تسمسرات '' اولا باقا .

الفوندو : العمق بلغة الرايس ، ماكينش الفوندو تمّا باش يسرح الحوت .

الڭمرة : ضوء القمر بلغة الصياد : عنداك تنسا البيل راه ماكيناش الڭمرة .

و لكم مني جميعا أصفى تعابير الود وأزكى التحيات .

[vivmoroco]

بسم الله الرحمن الرحيم

جزاكم الله الف الف خير ردٌيتوا لنا لعقل اللي كنا كانقلبو عليه شحال هادي الله يحفظكم .
واحد المصطلح عزيز عليٌا بزززاف يالله تفكرتوا وهو( الشٌاطوور) ملٌي كانشدو بززاف ديال الحوت كانكٌولوا اليوم غادي نتغداو ولا نتعشاو بالشٌاطور تانجمعوا لعواد يعني لحطب أو تانشعلوا شي (زهٌارا ديال العافيا) حتى اطيح اجمر أو كنتجمعوا حداها أو الرٌيحا ديال الدخان كاطعطر الجو الى كان الليل الكٌلسَا ما يمكن نقدر نعطيها شي وصف والى كان انهار كانسربيوَ باش نمشيوْ نصيدوا قبل ماتفوتنا الوقت .
أو كاينا ( الخردوولا) يعني الحوت طايب فالطنجرا بالشرمولا ديالوا كيما تانعرفوها جميع .
أو كاين الحوت( طايب فالحفرا )هاد الطريقة كاينا غير فالجنوب وهو كانحفرو واحد الحفرا فلأرض على شكل دائري اللي كايكون القطر ديالها فحدود ال 30 سنتيم والغرق ديالها ال25 سنتيم وتكون عندنا واحد الطرف من الحديد باش نغطيوها
أو كانقادوا الجوانب ديال الحفرا بالطراب معجون بالماء فالقعر ديال الحفرا نديروا فيه الكياس الصغير وهي حجارة صغيرة اللى كايكون حدا لبحر.
ملٌي تنشف الحفرا مزيان نجمعوا لحطب نحطوه داخل الحفرا نشعلو فيها النار حتى تسخن مزيان نحيدو ما بداخلها من الجمر نخليوُ غير شي شويا .
داك شي اللي حيدنا ديال اجمر نديروه فوق ديك لحديدا باش غادي نغطٌيوُ الحفرا نكنوا وجدنا الحوت ديالنا بالطريقة باش كانديروه فالفران ديال الدار فشي إناء مقاد مع الحفرا نغطيو الحفرا بديك لحديدا اللى عليها الجمر ونراقبوا الى خاصها اطياب نزيدوا خطرا خطرا غير شي عويدات فوق لحديدا أو نفخوا فيهم حى إشعلو ؛ يمكن ليك اطٌيٌب بهاد الطريقة جميع لحوايج اللي كايطيبوا فالفران .
ما عرفنا فين غادي إخرٌجنا هاد الباب اللي فتحتي لينا أ الرايس Sargus من المصطلحلت حتى خرجنا فالشهيوات .
على أي حال لقد زرعت البذرة الطيبة في أرض طيبة ولك مني أزكى آيات التقدير والإعجاب ولكل من Adhamsurfcasfing و El mostafa وSimoadilsat وجميع الإخوة المشاركين في هذا المنتدى .
كما انني اتطلع الى مشاركة اخينا Capitin واخباره أتمنى له ان يكون في صحة وعافية .

والسلام عليكم ورحمة الله

[el mostafa]

[B]السلام عليكم....غادي نزيدك هادي زوينة أوغادية اتعجبك الرايس vivmorocco حيث عرفتك كاتصيد الكوربينة ...حيث حتى أنا مع العمل كنت في طانطان من 1991 حتى 1996 أوكنت كانصيد الكوربين في العريكات أو أخفنير... والكلمة اللي غادة تعجبك هي
الكرارة بالنسبة لباقي الرياس الكرارة هي مللي كاتهجم الكوربينة الكبيرة على المصيد وبأعداد كثيرة..ها واحد كايكرش.. ها 2 أو لا [/B3 كايتسناو نوبتهم باش يكرشو....أو ها 4 اخراين امشانقين.....
هادي هي الفراجة مللي كاتكون الكرارة الريحة ديال الكوربينة كاتوللي تشمها من فوق المصيد.... ايوا الله يجيب شي فراجة والسلام
أشكر الرايس adhamsurfcasting على الصورة التي يضعها في صفحته وعلى ما اظن انه هو السطح المزيان ديال الصيادة الكوربين والمصيد يسمى موريام ........وتحية للجميع

[vivmoroco]

بسم الله الرمن الرحيم

اليٌيه أ الرايس El mostafa كنتي فطانطان فليام للي كانت الكوربينا كاتدير فيه (لكٌرارا) اما اليوم الى دارت لكٌرارا
كاتديرها غير فبعض لبلايس زوير لغلم ولا لمزيلكٌا أو ماشي ديما .
دابا خصنا نمشيو لجرف لحمام ولا زويرات باش نصيدو الكوربينا ،غير الله يستر .
ولكن ربي كبير باقي كاين بعض اللقطات .
ما خصك شاي تنسا هذيك ليٌام أو خطرا خطرا زور هادوك لبلايس وخٌا غير كصلة رحم الله إخلٌيك.

والسلام ليكم ورحمة الله

.

[sargus]

السلام عليكم و رحمة الله تعالى و بركاته

ما أغرب ، ما أجمل ، و ما أروع هاذ البلية الشيقة .
و ما أسخاكم إخواني الرياس الأعزاء و ما أكرمكم .
تندهش العين و يفرح القلب و يستمتع الفؤاد بقراءة كتاباتكم و الإستفادة من احترافيتكم .
أسأل الله تعالى أن يرزقكم علما نافعا و جعل كل جهودكم ان شاء الله في ميزان حسناتكم .

أخي الغالي vivmoroco لا أخفي عليك أنني استمتعتك كثيرا و الله بقرائتك ....
أولاهيلا شهيتينا فشي خردولا دايزها الكلام .
أولا باركة علينا غير شي زريقة طايبة فالحفرة و كلشي الناس ديال المنتدى نتجمعوا عليها .

أخي الحبيب el mostafa ديك المرة ڭلت ليك القوس وقف غير تفليت معاك
و لكن دابا نوض ديال بصح راه يالله جاني الخبار راه كاينة الكرارة اونزيدك راه راشم حتى بوشوك .
يا الله سير شحطها ، أو الشاطور اللي جابوا الله نتجمعوا عليه مع الإخوان الرياس كاملين .

و أرجو من جميع الإخوة الرياس ان لا يبخلوا علينا بمشاركاتهم
،ردودهم ، تعليقاتهم ،اضافاتهم ،تصحيحاتهم و كل ما يمكن به تكميل و إغناء الموضوع ..

لكم مني جميعا أجمل و أبهى مشاعر الود و الإحترام .

[el mostafa]

السلام على جميع الرياس.....
الى الرايس vivmorroco لما كنت في طانطان كنت اصيد ب...المزلقة....زول لحرش...موريام....الجمل...وكلها مصايد شفت فيها لكرارة بعيني......و سهب الحرشة كنت كانصيد أبلاغ ...
ولقد رجعت للآمكنة بهده المنطقة في 2004 صيدت غير نهار واحد ومشينا نتساراو شي شوية في العيون حيث لم يكن الوقت كافي...الاختصار صيدت 2 كوربنات 8 كلغ اودرعي 3.5 كلغ...
وفي بداية هده السنة وباالتحديد من يوم 1/2/2008 الى 22/2/2008 دهبت رفقة بعض الاصدقاء الى الداخلة وبالضبط...العركوب...وبالتحديد المصيد المسمى "دار الصباليوني" فيه الكوربين وبالقرب منه المصيد المسمى " رأس المشة" الموجودة فيه الزريقة..والفاغرو..والبوغة...السمكة اللي كايسميوها هنا او في كازا الميرو....مع العلم انها ماشي الميرو...
ايوا هادي هيا الاخبار...وتحية لكل الاخوان....
الله يجيب غير الصحة والسلامة...شي مرة انتافقوا وانديرو شي رحلة لهادوك الاماكن ديال الصيادة بصح
........خفنا غير شي وحداين يعجبهم الحال ويحرقو لينا تما ويبقاو مع الرايسvivmorroco راه اللي ولف تما ديك الصيادة هاد الشراغة ديال كيلو أوجوج اوليو يبانو ليه غير بحال المصفي.....
والسلام على جميع الاخوة

[vivmoroco]

بسم الله الرحمن الرحيم

كيف قلتي الله إلاقينا فساعة الخير ان شآء الله .
من جهتي انا هاني موجود أو غير فطريقكوم إلى حيانا الله حتى لهاديك لوقيتا .
بغيت نكٌول غير خططو ليها مزيان أو نديروها علاش الا انت راه عرفتي لوقات اللي كاتكون الصراء مزيانا أو الجو ديال الصحراء كيداير اما الخير باقي موجود .

والسلام عليكم ورحمة الله.